هي الليالي بحزنها
لسه في عينها دموع ؟
الناس بتأكل لحمها
ياريت دا كان م الجوع
الأصل قلة أصلها
والأصل ده الموضوع
الود كان بن العتب
صار العتب ممنوع
قلبي السواقي يجرها
ولا يوم زهقت أجرها
ولا مرة طلت أمسها
روت السواقي أرضها
طرحت عطش جوه الحلوق !!
من غير عصابة العتمة في قلب المكان
الليل كمان زي الكمان
داير بيعزف جملته علي خطوتي
دابت و تاهت في الضمير المختفي
الخلوة .. الخل الوفي
الوحدة والليل و العصابة
معصوب عينيك و قلبه مش قلب الديابة
الله عليك
الدم يجري علي السواقي حنة في ليلة الزفاف
يمكن يحنن قلب عمره ما كان يخاف
اجري و أتوه في الازمنة
ارسم خيالي من سواد الهم و اغزل امكنة
وافرش علي الارض الظلام من عقلنا
وأمسك سيوف احمي اللي باقي في نفسنا
من نور و حب و سماح
بس العصابة علي العيون والراس
سامع صهيل و نواح
من امتي كان الفارس عن الفرس ينزاح
الكل غادر ماكر
ومين ع السواقي أمين ؟
صوت المطر بيدق
يزرع في قلبي جمال
والدقة من قلبي بتعزف الموال
والدعوة في الملكوت
سارحة بعلو الصوت
لا البرق يحجبها
والرعد منها يموت
انا كلمة الحق وليا حقوق
الماضي كان كدبة
وللشهادة حقوق
وفي لحظة الفتنة
يبقي الجميع محقوق
#محمد_طاهر
ليست هناك تعليقات:
إرسال تعليق