البحور
المراكب لِسَّه تايهة !
والشراع رافع إيديه
واقف يصد الريح هناك
الموج يقلب في الهموم
والنوة جاية من بعيد
حامل في بكره والالم
ودفتر الأيام يعيد
البحر عاش مالح
يداوي في الجراح
طول عمره قاسي في رحلته !
الموت بيسكن صفحته ...
الخوف بيرسم لحن ليه من شهقته
ما تصدقوش لو يوم ضحك !!
البحر ساكن في العقول وفي الضمير
والفكر موجه ودمعته
والصخر واقف ع الشطوط
يمنع خروجه علي البيوت و يسّكته
والليل يخبي المكر فيه
ويحيل عليه وجع السنين
وفي النهار يرسم ملامحه من جديد
لوح جميلة و شقشقات
عصافير و نورس بتناجيه
ولون عينيه لامعة بضحكة الشموس
منقوش عليه حرف الزمان
شاهد علي عصر الحيتان
ممنوع يحّكي علشان كبير
وكل سر البر فيه
كل المراكب ع المراسي معاه صحاب
مين قالك ان الشر جوه عقولنا شر
والمكر يغزل في النفوس لون الشجن
مهما تغطيه ضحكة باهتة وتتفتن
الليل ينوح زي السعال
من صدر ضاق بيه الزمن
الكل ماشي في جسر وكلاه المحن
ومرايته تبقي ماضي ليه
وحاضر واقف متهم
ليست هناك تعليقات:
إرسال تعليق